Japehan Kang Yardi: Jangan Milih Riye Aseka Riaye; Nak THR Gale

wartabianglala.com – Sekitar tige minggu agi dusun-dusun di Kabupaten Lahat tercinta ni ka rami. Sebanyak 230 dusun ka milih Riye sesuai ati nurani (munie) sesuai pule nggak care demokrasi.

Li karne itula, lok tradisi sandi dulu sampai maini, sape ka ncalon humahe pasti rami. Pendukung bekumpul sandi pagi nggok petang, sandi petang sampai ke malam aghi.

Ye lanang ade ye ngicikkah care ncakae ayam, ade ye main gap sambil makan kecepul ngagak buarengas sambel ngihup kupi. Ame dulu ade ye bagian jampi menjampi mangke riye ye didukung aman tekendali. Entah ame maini? (aseku giade kinah ye lok itu sampai maini) ha-ha-hi-hi….

Ame ye betine lain pule gawi. Sibuk di dapuw bemasak nggak nyiapka kupi. Sambil begawi sesekali nginaki laki kalu saje ngicikkah jande keribangan batin di dusun ni. Awas ame kedapatan pacak cenila melayang ke dai.

Ye calon riye, duduk nenepi. Sesekali mantau tim sukses, nanyeka; rami ye mane di badah calon riye ye lain ape di humah ni? Sebenare tuape kinah jawabannye same behat di ati. Ame dijawab tim sukses ramilah di sane, tepikir aseka kalah aseka rugi. Ame diumungka ramilah di sini, tepikir waktu pemilihan ye gi lame dikalika nggak pengeluaran ndik gule kupi. Lum agi kumpulan biawak ye dikit-dikit nak dana, alasan ndek mbeli itu ini. Ame dide dituhuti suahenye aseka belaghi. Nduk cacam…, tambah pening palak calon riye merupuki.

Nah…, jadi ame kejadian la luk ini, janganlah kite jadika pemilihan Riye atau Pilkades ni luk Riaye, di mane tiap calon Riye dipintaki. Kanye tini duit tuk THR Idulfitri. Lagika endap rege diri ame suahe pacak dibeli.

Pikirka calon riye tu la tepening ndek mudal ngumpulka jeme rami. Udem tu, jangan nian gegara Pilkades laju ribut–nggak jeme parak huma dek seteguran agi. Jangan benae gegara laen pilihan laju kemaghau setaun rusak li ujan sepagi. Karne ye namenye sedusun usurannye masih ka besanak bukan jeme lain agi. Sape kina ye njadi ye penting kite la milih sesuai gak ati nurani.

Udem tu ye bekumpul tulah di badah Calon Riye sampai pagi, jangan sampai sembayang laju dek tehingat agi. Jangan pule bekumpul laju mabuk-mabuk’an atau bejudi, itu namenye la lain gawi. Lemaklah benyanyi, nari, dengan tujuan ndek nguatka silaturahmi.

Udem eh, itu saje japehan Kakang saghini. Pagi kite betemu agi nggak japehan ye lain agi.

 

Salam

Kang Yardi

Pos terkait