wartabianglala.com – Ade pule penggawian jeme Lahat ye njadi kelahayan dek tau dide. Gegara nak pilihan kades tanggal 9 bulan 12 ini kele, gibanyak benae ye belom ade KTP. Ade ye lengit, ade ye rusak, banyak pule ye nelum nian be-KTP.
Jadi, mulak’i lah calon-calon kades begulut ngantat masyarakat ke kantor Catatan Sipil.
Laju penasaran, ku tanyekah sandi mane kamu Ding, Yuk, Kang? Sate tedengae timbalane, ade ye sandi Kikim, ade ye sandi Jarai, Pagar Gunung apean ade pule. Temasuk pule jeme dusun kami ngerbere pule ke Kantor Capil.
“Tuape gawi kamu reramian di sini?” jiku.
Ade ye nimbal, “Ooi…, jeme di dusun kami tu nak pilihan kades… kami ni ade ye belum be-KTP. Laju mbuat kudai. Tape calon kades kami ni galak ngantat (munie). Anye tuape ilok pule, laju masyarakat pacak be-KTP.”.
Itulah laju la parak 2 (due) bulan ini kantor Capil rami luar biase. Sajak mbuat KTP mane mbuat KK baru ade mbuat Akte Kelahiran pule. Singgenye tiap ahi dek kurang di 100 lembae surat keluae per macam.
Anye ye ngajung bingung ni ngapelah nak nunggu parak pilihan kades nian mangke mpai behije mbuat. Ape li diungkusi? Ape li nak milih jeme itu? Dek keruan li aku.
Anye ame bagi aku teserahla die. Ye penting masyarakat laju ade KTP gegara itu, hihihi…
Mak mane uji kamu banyak…?
Salam
Kang Yardi
