Japehan Kang Yardi: Masih Kina Bepanas Ngantri

wartabianglala.com – Nah-naaah, lok mane ame lah lok ini, penggawian masyarakat Lahat ni…?!? Dek keruan li aku undang-undange, peraturanne luk mane nian tini? Anye tiap ade mubel mbawe tabung gas ke pangkalan mane saje singgenye la berarek jeme nak mbeli.

Ase ka tetitik ayek mate nginak barisan panjang di pangkalan gas elpiji. Ame upacara benderahe di mane pusisi, demtu gi sebaris panjang lok tali. Ade ye lum mandi, ade ye masih bedaster lum begenti, ade ye ngilik kupik sambil disusui, ade cenilah tetukar sebelah dek keruan agi, ade ye keninge ngeriput mikirka anak sekulah lum dijemputi. Anye makmane, ame dide ngantri, dapuw dek behasap kene marah laki. Cube sesekali, mangke kehasean, ajung laki tulah ngantri.

Kekadangan tuan pangkalan nyenyegak pule dek mikirka ase di ati. Kebile datang gas semubel gancang – gancang diajung masuk takut dikinaki. Jeme la bepanas, tepeluh liut, mbatak tabung bangkang mash dirutuki. Nanyeka KK, KTP, ame sakdi jauh dide dilayani. Aseku masih ka jeme Lahat nilah rabanan ini.

Ka makmane li uji. Dek beudem antrian panjang ni. Awak jeme Pertamina la rapat nggak Pemda, nggak DPRD teke Gubernur la ninjau langsung didampingi Wakil Bupati. Masih kinah lum ade solusi? La telaong di Pesbuk, tekak berita di media-media pule la rami, anye masih kinah lum ade solusi?

Aaaai dem la bebueh mulut aku li bejapeh ni. Dek keruan ka diurus jeme ape dide tini. Cuka rupuk’i li kamu banyak gawi ni.

Salam

Kang Yardi

Pos terkait